يا يما جيت أسأل ليه حظي مجافيني...
يا يما جيت أسأل ليه أنا حظي مجافينـي
أشوف الناس ملتمه وأنا ما بين حسراتي
أشوف أفراح من حولي أسلـم ماتحيينـي
أحاكيها يافرحه وين؟ حلفت إنك تزوريني
أشد بحكي ثم أرخي أداعبهـا بهمساتـي
ولا في فايـده يمـا برغبتهـا تمشينـي
تواعد ثم تخلفني أو إنها تنسى أوقاتـي؟
أنا اذكر دعوتك لله ... طلبك إنه يخلينـي
طلبك إنه بيرزقني و يوفقني في بداياتـي
تعلمت الدعاء منك وصارت عـادة فينـي
إذا نامت عيون الخلق أوجه لربي دعواتي
رجيت بصوت كله خوف متأمل بيعطينـي
لأجل أفرّحك يما رجيت وزدت رجواتي
تمنيت دنيتي تصدق بدعواتي وتوفيني
كتمت الآه لا تطلـع ولا ودي تشوفينـي
تجرعت الألم يما شربته بـأول سنينـي
وجيتك ما بغيت إنك تحسي مـر لوعاتـي
ما عاد أستحمل العيشه بتزييفي لفرحاتـي
انا هلكان يا يمـا أنـا تعبـان ضمينـي
أنا كل ليله أتوفى وأرد أحيـا لصرعاتـي
ذبحني البـرد يايمـا بغيتـك لوتدفينـي
طلبتك انزعي بردٍ سكن واستوطن بذاتـي
ضلوعي تزاحمت يما بصدرٍ مـا يكفينـي
من الضيقه من همومي من آلآمي واهاتي
يلاعب فكري جنون و تلاعبني شياطينـي
توريني ضعف حالي ... تذّكرني بمعاناتي
تشككني بحبك لي واقـول انـك تحبينـي
ترى ما هزني خوفي وحبك لي بيحمينـي
ترى ما عمري أشكك وألومك في نهاياتي
أنا بس أسالك يما حقيقه ليه ولدتيني؟؟؟
بنفس اللحظه يا يما ولدتي ليه أنيني؟؟؟
أنا خايف من احـلامٍ نهايتهـا بتشقينـي
ومن قسوة مشاويري ومن آخرمسافاتـي
وخايف والله من قبري ومن تربه تغطيني
وسيرة تنقطع بعدي ما يبقى غيركلماتـي
__________________
لكل الناس وطن يعيشون فيه إلا نحن لنا وطن يعيش فينا...!!
|
