[أبو جاسم]

السلام عليكم......
هذه قصيده شعبيه .. باللهجه العراقيه
لمن يجيد هذه اللهجه فليستمتع بقراءتها
لانها في غاية الروعه .. وهي للشاعر
العراقي سيد سعيد الصافي


علي يا وجه رب الكون ياسر قدرته ولسان قرآنه
علي يلعلمت آدم يتوب شلون للباري بعد زلته وعصيانه
علي يا حصن دين الله ورحمته وفضله واحسانه
علي يا شاعر يوصفك لون حشم قوافي الشعر كلها ولملم أوزانه
أضن من حقه يا بو حسين يعثر بالحكي لسانه
علي يلعلمتنا دروس بكفاح وعسر دنيانا
انت القلت يابو حسين تقدر تعرف الفارس إذا ذب اللثام ونزل ميدانه
المهر المو أصيل يطيح من تهذب الخيل يعثر بعنانه
المركب لو يلطه الريح قلة فهم ربانه
وصقر الما يطيح بوم شا شنهو النفع من خفق جنحانه
ويستاهل يقطعه السيف راس الباع وجدانه
وديوان اليرد الضيف خليصلب ضميره بخشب بيبانه
علي يلقلت احكو، مكروه اليقول الحق بهذا الوكت مولانا
شسولفلك يداحي الباب حاير والسوالف كلها خجلانه
طحنا بشده يابو حسين وكم ذيب العلينا مكشره نيابه
قضينا ذبح مو تدري وكم حاقد تولانا
مولاي وسجن بغداد بالدم والجماجم بنو حيطانه
وياهو اليصدق ياعلي الكرار أهل أرض السواد تموت جوعانه
علي انت اليسمونك حماي الخيل وحامي جيرانه
مثل هشده يا بوحسين ريتك حاضر ويانه
وتشوف الزمان شكثر ضيم وقهر راوانه
بعد عزنا نمد كف المذله الوكت خلانه
العراق تيتمت أطفاله يابو حسين وترملت نسوانه
وادي الغري يا كرار ضلت بشوارع جثث شبانه
ومؤذن مسجد الخضرا برقاب المناير خنقو وذانه
وبعد شحكي وشسولفلك ضريحك يا علي صبغوه بدمانا
علي شيعتك احنا وغيرك شعدنا من حقنا نوجه الك شكوانا
علي حقه الغريب ينوح من يشتاق لوطانه
علي كل جروح تطيب بس جرح الوطن ما يبرا نيشانه
علي بشخصك تنخينا وحشا مثلك يداحي الباب ينسانا